Sa mundana cummedia

 

 

Introduction
Family
Hobby
Talents
Album
Recommend

 

 

 

Sa mundana cummedia

Salvatore Poddighe

PARTE PRIMA

1.

De Dante su poeta de Toscana,

sa Divina Cummedia leggimos;

e noi sardos prite non faghimos

un'attera Cummedia mundana?

pro dare lughe a sa zente isolana

sos chi s'estru poeticu tenimos,

pro chi non bastat sa Divina sola

a sa Sardigna nostra a dare iscola.

 

2.

Dante, de una mente illustre e digna,

tra sos poetas hat sa prima sedia;

in versos hat descrittu una Cummedia;

contra a sa setta perfida maligna,

e nois cantadores de Sardigna

nos istamos a morrer de inedia?

no, no, frades, bintramos tottu in giostra,

a fagher puru sa partida nostra.

 

3.

Est beru chi fit Dante Alighieri,

de sentimentos fìeros, gagliardos,

e noi semus che fizos bastardos

contra de issu in tale mestieri.

Poi, chi balet unu furisteri,

naran a dicciu, prus de deghe Sardos,

ma tottu custu ispaventu e paura,

non faghet a sos donos de natura.

 

4.

Dante, hat cantadu cun ingegnu ed arte,

ca fit in poesia meda esattu;

hat fattu tantu sì, ma no hat fattu

nudda de prus che i sa sua parte,

tra sos poetas fit su grande Marte,

lu bidimos de s'opera in dogn'attu

e già ch'issu l'hat fatta, naro a bois,

sa parte sua, toccat como a nois.

 

5.

No isco bonu s'a cantare hap'essere,

pro ch'hapo sentimentos pagu espertos,

e istruidu non seo che certos

chi piùs bellos versos ischin tessere.

Intantu provo, si b'hapo a resessere

solu cun donos de natura offertos,

senza istruzione, e senza istoria

chi aggiuet sa debile memoria.

 

6.

Su tema ch'hapo in conseguenzia,

de risolvere deo, a dogni frade;

est, s'andamentu de s'umanidade

da cand'in terra hat happidu esistenzia.

Origine fundamentu e dipendenzia

de sa ricchesa e de sa povertade,

pro chi medas ancora no han cumpresu,

poveru e riccu coment'est dippesu.

 

7.

Ministros de su religiosu impreu,

a crere a sos populos han dadu;

chi chie est in su mundu isfortunadu

est, chi fortuna non l'hat dadu Deu,

su chi non creo giustu a parrer meu

ch'i Deus si siat mai interessadu,

de dar'a chie su male, a chi' su bene

comente oe, sos bigottos crene.

 

8.

Deus che sapiente e bonu mastru,

send'unu babbu giustu imparziale;

hat dadu a tottu diritt'uguale

no hat fatt'unu fizu, unu fizastru,

no est pro naschere in bonu o mal’astru

s'istamos chie bene, e chie male,

tottu dippendet dae sa faccenda

de non esser comune sa sienda.

 

9.

Pro dare a s'impostura unu rimproveru,

presento 'e sa Cummedia su prim'attu;

solu pro narrer s'est, Deus ch'hat fattu

in su mundu su riccu e i su poveru.

Tue Musa ch'in me, faghes riccoveru

risolve nende cun mettodu esattu,

Deus hat fatt'ogni bene comunu,

però, riccu ne poveru a nessunu.

 

10.

Tottu sa razza umana senza erranzia,

si dipesa est d'una sola famiglia;

duncas; no est nessuna meraviglia

s'aian dogni cosa in comunanzia,,

no esistiat tando padronanzia

e ne mancu discordia ne puntiglia,

comente fin sos benes de cumone

andàna a tribagliare in unione.

 

11.

De comente sa zente aumentiat,

e s'est tottu sa terra populada;

in dogni bidda cittade o burgada

su bene comunale tottu fìat.

Part’e dirittu dognunu teniat

comente de bessidas e d'intrada,

fit in comunu patimentu e gosu

e nessunu non fit necessitosu.

 

12.

Comunale tenian terra e fruttu,

bestiamene e cantu s'est connottu

su viver necessariu aian tottu

de vegetales e dogni produttu.

Non fit nessunu padronu assoluttu,

dogni frade a su frade istàt devottu,

e cun tale sistema beneficu

non fit nessunu povero ne riccu.

 

13.

Ma dogni tempus benit pro passare

regnat s'amore e i s'ingratitudine;

si cambiat sistema e abitudine

sos tempos fattos sun pro cambiare.

Cun su tempus s'est bida diventare

sa fratellanza in ischiavitudine,

e tottu cuddu bene comunariu

est poi diventadu propietariu

 

14.

Cun su tempus naschida est s'avarizia,

in su mundu s'orgogliu e i su fele;

su primu fit Cainu contr'Abele,

prepotenzia usare e ingiustizia;

poi de nobilesa e de pigrizia

s'avaru d'esser amigu fìdele,

dae Cainu sa crudelidade

istesit post'in usu dogn'edade.

 

15.

S'est bidu poi s'omine non bonu,

cun trassas, cun astuzias e affrontos;

intimidire sos omines tontos

cun ispaventos e superbu tonu,

pro dominare issu che padronu

si los hat resos dociles e prontos,

a lu servire, gai est chi s'astutu

leadu hat su cumandu assolutu.

 

16.

A su mandrone fit sistema duru,

istare in fratellanza e unione;

previa chi s'aradu, su marrone,

toccat a manizare a issu puru.

E pro esser felice in su venturu

tempus s'est postu in possessione

de sos terrinos, pro non tribagliare

ch'est prus arte leggera a cumandare.

 

17.

Sos oziosos e malintragnados,

o furcajolos comente los giamene;

de terrinu comunu e bestiamene

si sun antigamente appropiados.

Issos tando sun riccos diventados

a sos tontos lassadu hana su famene,

e dae tando su mundu formadu

de poveros e riccos est'istadu.

 

18.

Tottus cuddos chi s'hana impadronidu,

antigamente su bene fraternu;

de su mundu leadu han su guvernu

e i sa frattellanza han abolidu.

Unu de issos re l'hana eleggidu

pro haer su dominiu in eternu,

e sutta custos tottu omines bravos

sos tontos sun restados ischiavos.

 

19.

Da' custos bonos e fieros Martes,

sos populos istesini obbligados;

send'ischiavos e umiliados

a tribagliare de tottu sas artes,

e divisos los hana in duas partes

una bracciantes e una soldados,

pro defender su regnu e i su tronu

e suggettare su malu a su bonu.

 

20.

Pro disciplina contra a sas chimeras,

de su populu ischiavu reduidu;

han puru antigamente costruidu

sos regnantes, presones e galeras.

Regulamentos e legges severas

pro sos ribelles hana istituidu;

e dogni pegus de s'umanu gregge

han suggettadu cunformas sa legge.

 

21.

Cuddos chi de prus grand'estensiones

de terrinos si sunu impossessados;

cun su tempus, si sunu nomenados

contes, ducas, marchesis e barones;

e distintos si sun menzus persones

de cuddos chi sun poveros restados,

gai s'astutu bennid'est civile

e i su tontu rusticcone e vile!

 

22.

Istituidu han omines fattores,

pro dirigentes de sos lavorantes,

Centuriones pro sos militantes

cun distintivos grados superiores.

De milites massajos e pastores,

custos fattesin de rappresentantes,

eseguinde ordines e doveres

giust'a sa volontade de sos meres.

 

23.

Ecco comente tra sa razza umana,

sos furbos su dominiu han leadu;

e cun barbaridade han guvernadu

a cantu sas istorias mi nàna.

Bendiana sa zente e comporana

a us'e bestiamene domadu

e da sos populos tottu sun istados

timidos, e che deos adorados.

 

24.

Tando est chi parziales sun bennidos

delizias mundanas e dolores.

E poveros da' s' epoca e segnores

in su mundu si sun distinguidos.

Ecco s' origine de duos partidos

meres de cumandare e servidores,

e dae tando chie arat e zappat,

e chie senza sudore pane pappat.

 

25.

Torramos como a Deu onnipotente,

comente oe cret calch'unu maccu.

chi s'est de su terrestre impossesadu,

siat fattu da' issu veramente.

Non Deus, ma s'astutu a s'innocente

hat obbligad'a fagher su teraccu.

E i s'astutu bennidu est servidu

cando su tontu s'est sottomittidu.

 

26.

Deus a nemos dadu hat martirizos,

e a nessunu sa felicidade;

e no hat fattu parzialidade

sende nois de issu tottu fìzos.

Est ingannu ‘e su mundu art'e manizos,

s'a chie est riccu e chie in povertade,

Deus lassadu hat sa terra comuna

e pro tottu uguale sa fortuna.

 

27.

Podimos sas delizias antigas,

nois cherinde, in su mundu gosare?

bastat però in comunu lassare

terrinos e produttos e fatigas.

Usende su sistema 'e sas fromigas,

vivende in fratellanza tott'impare,

e s'hamos in comunu ogni materia

nessun est riccu e nessunu in miseria.

 

28.

S'esserat d'esser in d'ogni paisu

fruttos e territoriu in comunu;

de s'arte sua tribagliare ognunu

su produttu tra tottu esser divisu.

Faghimis una vida 'e Paradisu

senz'essere isfruttados dae nessunu;

dimis esser felices e cuntentos

tottu, de grazias e de alimentos.

 

29.

S'antigu paradisu Eden terreste,

ch'han sos furbos istoricos giamadu,

certu chi cuddu tempus fortunadu

de sos benes comunes istad'este.

Inue naran su Deus celeste

ch'Adam'ed Eva aiat colloccadu;

ma sa giusta e sincera veridade

est, su prinzipiu 'e s'umanidade.

 

30.

Su Serpente malignu ingannadore

ch'hat s'antiga innocenzia tentadu,

chie creides chi siat istadu

custu vile demoniu seduttore?

iss'est s'omine avaru usurpadore

chi s'est de su terrestre impossesadu,

e lassad'hat sos tontos pro disgrazia

ispozados de bene, e d'ogni grazia.

 

31.

E si da calchi furbu o ignorante

no est su narrer meu applaudidu,

mi lu fettat toccare cun su didu

su chi cret prus demoniu devastante.

Deo piùs de s'omine birbante

serpente ne demoniu hapo idu,

in su mundu capace a fagher male,

e custu est su demoniu infernale.

 

32.

Naran pro serpentina tentazione,

Adam' ed Eva esser ruttu in peccadu;

e su peccadu chi siat istadu

de matrimoniu sa congiunzione

e ch' in su mundu pro tale cagione,

s'est su bene e su male originadu,

degai hat dadu a crere s'impostura

pro occultare ch'istada est s'usura.

 

33.

Si sa congiunzione vietada,

fit de su matrimoniu comente

sa terra d'animales e de zente

podiat mai benner populada?

o infame impostura! retirada

faghe dae su coro e da sa mente,

ca sena matrimoniu ista certa

de viventes sa terra fit deserta.

 

34.

Si fit su matrimoniu unu reattu,

Deus "creschide e multiplicade"

nadu no iat a s’umanidade

ne omine ne femina iat fattu:

ma ca fit necessariu tal'attu

est ch'issu hat permitidu s'unidade

pro ch'esserat su mundu populadu

e s'est utile, certu no est peccadu.

 

35.

Veramente sa frutta proibida,

chi Deus de toccare non cheriat,

atera cosa esser non podiat

si no sa terra arbur'e sa vida.

Sende comune senza dividida

custa, pro tottus grazias daiat,

non lassende sa terra comunale

nde naschiat su bene e i su male.

 

36.

Fit su bene comunu eternu e sumu

su proibidu simbolicu fruttu

ma si calch'unu padronu assoluttu

s'esseret post'in su terrestre pumu

andàna sas delizias in fumu

e in peccadu s'omine fit ruttu;

ca da su paradisu fora essiat

cuddu chi possidenzia non teniat.

 

37.

Fit dada 'e Deus sa permissione,

de sa terra ogni fruttu 'e mandigare;

e i s'umanidade de istare

totu in fratellanza e unione.

Ma fatt'haiat proibizione

de sos terrinos a s'impossessare,

ca bene ischiat chi cun su possessu

beniat s'avarizia e s'interessu.

 

38.

Culpa de s'usurariu demoniu,

su poveru est de grazias ispozadu;

non pro ch'hapat cumittidu peccadu,

unidu a sa cumpagna in matrimoniu,

ma pro l'haer dirittu e patrimoniu

su malaittu serpente usurpadu,

ed est restadu senza nd'haer culpa

che ossu rosigadu senza pulpa.

 

39.

Ma furbamente s'omine impostore

a su tontu sa frase hat coloridu.

e narat, chi su fruttu proibidu,

est s'attu congiuntivu de s'amore:

e i su mundu esser ruttu in errore .

ch'Adamu a Deus hat disubididu;

e Deus pro dispettu de improvisu,

l'hat iscacciadu da su paradisu.

 

40.

Ma si tale impostura esserat vera,

da' su giardinu terrestre iscacciados

tottu sos prinzipales fin istados

pro sa libidinosa violera.

De Adamu in sa propria manera

dian esser de grazias ispozados,

invece custos, giardinos e'fruttos

possedin e in peccadu ... no sunt ruttos.

 

41.

S'impostura ad intender puru hat dadu

chi pro tale peccadu tantu forte,

est intrada in dominiu sa morte

e a morrer sa zente hat cominzadu;

da cando Adamu est ruttu in peccadu,

mentres chi prima tenian sa sorte

d'esser tottu che Deos immortales

tant'omines coment'e animales.

 

42.

Dèo non naro chi faula siat

cantu nat s'impostora propaganda,

però fagher cheria una dimanda

chi si mai nessunu no moriat,.

comente in terra sa zente cappiat?

devia benner certu a dogni banda

tottu su mundu interu, senza iscampu,

prenu de zente che s'erba in su campu.

 

43.

Deus Adamu chi deviat morrer

su die chi su fruttu eret toccadu,

nos narat s'iscrittura, chi l’hat nadu;

ma sa morte ch'hat devidu proporrer

lu podimos cumprender e supporrer

moriat d’essere in felice istadu,

e mandigaiat su pane cun pena

andende a tribagliare a terra anzena.

 

44.

Da cuss'epoca senza propriedade

in su mundu est sa povera zenia,

e fina a cando naschet su Messia,

ch'est, s'unione tra s'umanidade,

non det gosare prus felicidade

giustu comente nàt sa profezia,

naschidu su Messia de protesta

a su serpente ischiacciat sa testa.

 

45.

Narat chi Deus unu Cherubinu

ponzesit in giardinu cun s'ispada,

pro ch'esserat sa frutta rispettada

da cuddu poveru Adamu mischinu!

de modu chi in su terrestre giardino

non tenzerat prus drittu de intrada;

e si'a prepotenzia b'intraiat

s'Anghelu cun s'ispada lu punghiat.

 

46.

Gasi in su mundu sos Deos novellos

comente da' s'antigu l'han connottu,

una legione formadu s'an tottu

d'anghelos cherubinos barracellos;

e terrinos, palazzos e castellos

custodiat s'agelicu cumplottu,

si calch'Adamu, chi ladru si narat

andat e fura. s'anghelu l'isparat!

 

47.

Naran chi Deus, culpa 'e sos peccados,

mandesit in sa terra temporales:

e de su mundu tottu sos mortales

restesin in sas abbas annegados,

e ch'intro s'arca si sunu salvados

solu Noè, cun fizos e animales:

e fattu hat des sos malos isterminiu

a sos bonos pro dare su dominiu.

 

48.

Ma it'est in veridica materia,

de Noè, sa grand'arca salvatrice?

fit su vile sistema usurpatrice

chi cun sa sua infame cattiveria,

mandadu hat su deluviu de miseria

supra sa zente povera infelice,

e salvados si sun certu sos bonos ...

chi de su mundu benzesin padronos.

 

49.

Ecco comente in su mundu est bennidu

s'origine de su bene e de su male:

sa disfatta 'e su bene comunale

istesit su peccadu cumittidu.

E su s'haer sa terra impadronidu

intesit su diluviu universale,

e su nou sistema, su monarca

certu de salvamentu istesit s'arca.

 

50.

Sos ch'intro s'Arca hana fattu dimora

si sun da' sas miserias salvados,

e contàna chi mortos sun istados

sos chi de s'arca restados sun fora;

ca senza possidenzia sun ancóra

poveros tottus e disisperados,

e morin in mesu s’inundazione

de povertade e disperazione.

 

51.

Pustis ch'est su deluviu cessadu

de sa facenda usurpante demonia,

leggimos chi sa turre 'e Babilonia

han sos omines furbos fraigadu,

pro paura ch'appende aquistadu

già sa mundana suprema Egemònia,

da su podere no pottan crollare

beninde su diluviu a torrare.

 

52.

A cantu nàt s'istoria sagrada,

e diversas ancora opiniones,

nach'istesit de pedras e mattones

sa turre de Babele fraigada.

Pro me naro chi fìt edificada

de Barones, de principes, de Contes

de Ducas, Cavalieris e marchesis

in tottu sas cittades e paesis.

 

53.

Sa turre de Babele senza farta,

devet bene comprender dogni umanu,

chi no est unu fabbricu de manu

de comente sa oghe s'est isparta;

ma cudda turre politica e arta

de antigu dominiu sovranu,

custruida cun arte, e cun ingegnu

sa ch'est óe, esistente in dogni regnu.

 

54.

Ecco comente in su globo terrestre,

giamadu paradisu deliziosu,

su serpente malignu insidiosu

de dogni bene impadronidu s'este.

E de su proletariu pro peste

hat puru su dominiu poderosu

e cheret ubbididu si cumandat,

e guai de cuddu chi no andat!!

 

55.

Unu guvernu devet dominare

pro non succeder ne briga ne gherra,

ma fattigas e fruttos de sa terra

devian esser in comun'e pare:

no una parte sola profittare

e s'ater' haer de pane una perra,

si su bene comune s'est connòttu

devimis tribagliare e goder tottu.

 

56.

S'est de tottu su Sole e i sa Luna

e s'aria de tottu a respirare,

si de nascher'e morrer ugualare

cherfidu hat sa natura, sa fortuna,

prite sa terra sienda comuna

de nois tottu non podet istare?

Subra custu su drittu de giustizia

mancat, proite? Culpa 'e s'avarizia.

 

57.

Intes'hazis comente hat caminadu

s'umanidade de su mundu intreu?

cumpres'hazis chi culpa no nd'hat Deu

si chie est riccu e chie isfortunadu?

ben'hapo custos versos dedicadu

pro chi cumprendat s'omine babbeu,

si chie est riccu e chie mendicante

est causa de s'omine birbante.

 

 

SECONDA PARTE

 

1.

S'istoria legginde a pramu a pramu,

dae Adamu finas a Noè

no esistiat moneda ne Rè,

send'in vida su patriarca Abramu:

de sa.moneda esistidu est su ramu

lu narat in sa Genesi Mosè,

ma post'in cursu e perfezionada

da su re Cinesu Fu, est istada.

 

2.

De s'avarizia s'origin' infame

sa moneda nat ch'est sa zente dotta:

sa prima istesit fatta 'e terra cotta

sa segunda de pedde o de corame

poi de ferru, de prumu e de rame

cun su tempus andende s' èst connotta

e in fine de carta oro e prata

e de nicchel 'e brunzu istesit fatta.

 

3.

In possessu de sos avaros mannos

sa moneda est da epoca lontana,

prima d'esister s'Era Cristiana

dua mizza e già settighentos annos.

Non fin tantu in su mundu sos ingannos

Cando moneda no nde manizzàna.

Da cand'istada est sa moneda in usu

creschidu est s'ingannu prus e prusu.

 

4.

Cando moneda non s'agataiat

in cale modu si cummerziada?

Beniat pari pari iscambiada

sa merce chi dognunu produiat.

A su poveru chi trabagliaiat

comente tando su riccu pagada?

No mancat no, de lu rettribuire

in cosas de pappare e de bestire.

 

5.

In cussu tempus antigu e inopiu

senza moneda viviant l'ischimos:

oe chi sa moneda nois tenimos

forzis proffittu nd'hamos a su dopiu?

Paret a mie ch'istamos su propiu

e dae s'usu antigu no transimos;

ca sa moneda andamos a gastare

in bistimentu e in cosa 'e pappare.

 

6.

Prima d'esser in usu su dinari

su poveru fit menzus favoridu,

ca su mundu non fìt tantu accanidu

tando comente oe, in dogn'affari:

mancari s'interessu pari pari

e i s'ingannu esserat esistidu:

non fit certu sa zente in dogni cosa

tantu comente oe, interessosa.

 

7.

Bene cumprenden sas dottas persones

cando moneda no si nd'agattada

in su mundu nessunu no pensada

a ponner in sa Banca miliones!

Ma pensaian d'haer provigiones

solu da una  a  s'atera annada:

senza su monetariu isquillu

fit prus su mundu in paghe, tranquillu.

 

8.

Mentres cun su sistema monetariu

creschida est s'avarizia senza contu,

ca finzamentas s'omine pius tontu

est diventadu in su mundu usuraiu,

siat bracciante siat proprietariu

pro regollet moneda est sempre prontu!

Cun asuria e cun avidu coro

massimamente de prat'e de oro.

 

9.

B'hat prus de unu riccu possidente

amante de moneda e abbramidu,

ch'istat isporcu e male bestidu

e si castigat finzas de sa brente;

de lavorantes puru similmente

medas economistos nd'hamos bidu,

de totu custos males senza pausa

sa moneda est s'origine sa causa.

 

10.

Cun sa moneda dogni birbantesimu

in su mundu fatt'hat grande progressu,

s'istrozinismu, su vile interessu,

s'ipocrisia, su gesuitesimu.

Medas si benden pro un cintesimu

s'anima, sa cussenzia, e oppressu

est pro sa monetaria materia

su lavorante d'estrema miseria.

 

11.

Si sun bidos alcunos principales

chi dinaris possedin a isportas,

fagher derettas sas causas tortas

in cortes de assisi, in tribunales:

cun falzos testimonzos illegales

personas reas benzesin assortas,

e cundennados tantos innocentes

chi de dinaris non fin possidentes,

 

12.

B'hat prus de unu fizu disonestu

de calch'omine riccu benistante,

d'haer dinaris a manu bramante

pregat finzas su babbu a morrer prestu!

Senza de cust' est craru e manifestu

comente nd' hamos bidu d'ogn'istante,

a sos dinaris pro haer amore

medas feminas mancan a s'onore.

 

13.

Naran chi sa moneda est preziosa

pro eleganza e pro comodidade

deo puru l'amito, in veridade

ma però de tott'ateru est dannosa.

Ca de malu nd'hat naschidu ogni cosa

superbia, egoismu e crudeltade;

omicidios, furtus, tradimentos,

cambiales e falsos testamentos.

 

14.

A bite servit s'oro e i s'argentu?

Narat s'omine dottu e sapiente;

servit pro fagher avara sa zente,

ma pro bestire ne pro nutrimentu.

Tottus l'ischimos pro isperimentu

sa moneda non servit a niente,

mentres chi, s'arga, disprezzada cosa

est meda prus de s'oro valorosa.

 

15.

Balet prus s'arga de su muntonarzu

de s'oro, de s'argentu e de su ramene.

Paragonare s'oro a su ledamene

m'hazis a narrer chi so faularzu?

Nademi trigu, simula e chivarzu

legumenes, erbaggios e fruttamene,

de s'oro, de s'argentu e de su ramene

o sun de su ledamene sos fruttos?

 

16.

Si fimis tottus in su mundu riccones

e nessunu pensàt de tribagliare,

dimis tottu de famene crepare

prata e oro teninde a muntones!

Ca senza su tribagliu 'e sas persones

no nos podet sa terra alimentare;

e si a tribagliare no andimis

riccos d'oro, de famene morimis!...

 

17.

Lassamos como s'oro e i s'argentu,

sos miliardos cun sos miliones,

e faeddemus de sas religiones

si partin da Divinu fundamentu:

o si est tottu mundanu un’inventu

de birbantes, e furbos e mandrones;

s'est de Divinu o mundanu istituttu

connoscher la devimos dae su fruttu.

 

18.

Da' su fruttu connota est sa pianta

si est de bona o mala calidade,

si dat fruttos d'amore e caridade.

Si podet narrer chi est bona e santa.

Ma si santa de lumene la nanta

e donat fruttos de barbaridade,

iscusa o mundu, cumpatti e perdona,

non poded esser ne santa, ne bona!

 

19.

Sa religione, amore e fratellanza

deve pro esser santa istabilire.

pro esser giusta devet abolire

sa servitudin'e sa padronanza,

e devet imitare s'uguaglianza

gosare tottus e tottus pattire!

E si no est de tale condizione

Santa e giusta no est sa Religione.

 

20.

Deo naro: s'esserat decrettada

sa religione tra s'umana zente

de unu Deus veru onnipotente,

una sola in su mundu fit istada.

Invece d'una ottighentas che nd'hada

e tottus tenen Deus differente

mentr'una sola e unu solu Deu

deviat esser in su mundu intreu.

 

21.

Bidinde finzas sos prus ignorantes

prestare cultu a tantas Deidades,

cumprenden chi sun tottu falsidades

e de mancuna diventana amantes;

aman de viver liberos pensantes

e da' sas religiosas societades

connoschinde s'ingannu ei s'imbrogliu.

Fuin attesu che barc'a s'iscogliu.

 

22.

Pro chi siat dognunu a connoschenzia

presento in s'argumentu seguente

in cale modu tra s'umana zente

est bennida de Deus s'esistenzia;

de su creadu sa magnifìcenzia

s'idea ha fattu naschere in sa mente,

a s'omine terrenu abitadore

de un Ente supremu creadore.

 

23.

Istellas, Sole, Luna, terra e mare,

lampos e tronos tempestas e bentos

sun istados sos primos fundamentos

ch'han devidu sa fide fabbricare

d'unu Deus ch'hat devidu creare

astros de chelu e de terra alimentos;

dognunu in coro sou hat ideadu

unu Deus mirende su creadu.

 

24.

Deu s'jerru sa rigida frittura,

sos immensos calores de s'istade,

sos fruttos de s'attunzu in cantidade

e de sa primavera sa bellura;

omines fattos a dogn'istatura

animales de dogni calidade,

su naschere, su morrer in comunu

naran de Deus operas chi sunu.

 

25.

Duas semplices cosas sunu istadas

origine de Deu e fundamentu;

sa meraviglia unida a s'ispaventu

chi causadu han sas cosas creadas:

sos terremotos sas malas annadas

maladias de tristu avvenimentu,

e in Deus terrore o meraviglia

han fattu crere s'umana famiglia.

 

26.

Naran antigamente cunferidu

ch'hat Deus cun Adamu e cun Noè

Abramu, Isaccu, Giacobb'e Mosè.

Naran chi faeddadu l'hana e bidu;

ma si fìt beru, d'essere apparidu

a tottu custos su Divinu re,

lasso decider a sos sensos bostros

fit apparidu puru a tempos nostros.

 

27.

O tando a sos terrenos abitantes

cumpariat ca fin prus innocentes?

No. Ca leggimos a ojos videntes

chi tando che i como fin birbantes

fin de occhire e de furare amantes

forsis piùs de sos tempos presentes!

Si tando a sos birbantes cumpariat

Deus, puru oe cumparrer deviat.

 

28.

Si s'est lassadu su Deus celeste

bidere antigamente e faeddare,

a tempos nostros a nos visitare

poite mai cumpartu no este?

D'esser tando masedu como areste

Deus, custu non podet mai istare.

Sende su mundu e Deus su mattessi

diat cumparrer a a sos pabas nessi.

 

29.

In ses dies su Deus infinittu

narat Mosè chi su mund'hat creadu

senza nudda haer bidu ne toccadu

de cant'issu in sa Genesi hat iscrittu:

cando Mosè fit naschidu in s'Egittu

aiat trinta seculos passadu

d'Adam' ed' Eva sa creazione

e no est che imaginazione...

 

30.

Cheria de mi narrer in cust'attu

su pius de scienzia profundu,

si Deus est su ch'hat fattu su mundu

o si su mundu est ch'a Deus hat fattu?.

Pro parte mia ch'est su mundu ingrattu

naro ch'hat fatt'a Deus francu e tundu.

E i su mundu bos naro in comunu

chie l'hat fattu non l'ischit nessunu.

 

31.

Da' tempus antighissimu remottu

curret de Deu in su mundu sa fama,

e tottu de connoscher sunu in brama

su fattore 'e su mundu sende ignottu,

narrer sempre chi Deu hat fattu tottu

amos intesu de babbu e de mama,

ca gai da sos furbos sunu istados

issos puru che nois imparados.

 

32.

No nd'est seguru nessunu vivente

chi Deus hapat su mundu creadu,

pro chi su mastru chi l'hat fabbricadu

nessun'a bidu in s'epoca presente;

nessunu certu est chi personalmente

a ue est Deu est andad'e torradu?

No sende certos, namos de gasie

su mund'est fattu, e non l'ischit da chie.

 

33.

Da' unu punzu 'e pruere impastadu

fragile e insensibile sustanza,

a imagine sua o somiglianza

Deus naran chi s'omine hat creadu:

però de cale razza siat istadu

chi l'hat fattu, non nd' hamos seguranza.

Mundu risolve narami e faedda

si fit de razza bianca o niedda?

 

34.

Si nd'hat fatt'unu de razza bianca,

su ruju, giallu, nieddu, olivastru,

fattu no est da su propriu mastru

oppuru fattu l'hat a manu manca.

Non podet mai essire dae farranca

de unu grande artista un'impriastru.

Sende fattos da' Deu, est craru e nottu

fimis de una razza istados tottu!...

 

35.

Si costruidu esserat s'universu

da unu Deus giustu e sapiente,

bos naro in veridade, mundu e zente

deviat tenner sistema diversu:

non fit istadu coment'est perversu

in su tempus passadu in su presente:

ma dian esser tottu sos terrestes

uguale a sos Anghelos celestes,

 

36.

Si unu Deus d'amore e giustizia

fit istadu de s'omine fattore,

in nessunu terrenu abitadore,

non deviat regnare s'avarizia;

ne una parte de zente in delizia

deviat esser ne una in dolore,

ma tottus uguales e che frades

devimis essere o mi lu negades?

 

37.

Si fimis fattos de Deu e fizos

non fimis in discordia ne in gherra.

fit istadu su mundu a dogni perra

unu giardinu de rosas e lizos;

regnat delizias, dolores, fastizos,

ca semus tottu fizos de sa terra,

e coment'est su clima differente

in ogni parte, de gai est sa zente.

 

38.

Sos primos abitantes supponiana

in su Sole sa forza soberana,

comente e veru Deus l'adorana

e grazias da issu imploraiana,

ateru Deus no nde connoschiana

e finas oe in sa terra Africana,

tottu de Cam sa discendente prole,

basat sa terra e adorat su Sole.

 

39.

Cust'est prova chi tando no esistiat

su nostru babbu eternu nominadu,

proite si s'esseret agattadu

su mundu a issu ricconnotu aiat.

Bidinde s'omine chi adoraiat

Su Sole, it'Issu diat haer nadu?

Certu deviat narrer mundu ingrattu,

non conosches su Deus chi t'hat fattu?!

 

40.

Ca send'issu su grande architettore,

chi cun operas bellas s'est distintu,

diat haer sos populos costrintu

a connoscher s'insoro creadore;

cun castigos oppuru cun amore

sos africanos haiat cunvintu

de venerare a issu ch'est su mastru

de tottu, e non su Sole ch'est un astru,

 

41.

Bidinde sos de s'Asia adorare

sos Deos: Zoroastru, Budda e Brama,

provat de custu Deus s'alta fama

chi mai nd'hana intesu mentovare!

Ma s'issu primu hat depidu creare

su mundu, puru 'e sa fide su drama

deviat haer tra custos diffusu

d'ateros Deos pro non fagher usu.

 

42.

A Cerere, a Diana e a Ciprigna,

daiat cultu sa Religios'arte,

e adoradu fit su Deus Marte

in sa 'idda de Martis, in Sardigna;

ca de su babbu eternu s'alta insigna

non fìt tando connotta in custa parte,

e non teniat de Deus su gradu

finacando sos furbos bi l'han dadu!...

 

43.

In s'Antiga cittade sulcitana

ue Sant’Antiogu, est oe in die,

bigottu aberi s'oju naro a tie!

Deos diversos ancora adoràna;

sa suprema potenzia soberana.

De su babbu eternu mancu inie

no fit; ca narat una antiga lapide

chi adorana Iside e Serapide.

 

44.

Sos Ebreos, cun fide e veru coro,

lu narat s'iscrittura e nde so certu,

adoran de Sinai in su desertu

pro Deus veru unu vittellu d'oro.

Signu e prova chi non fit s'insoro

su Deus chi Mosé lis hat offertu;

ca si l'haian da' tempus prolissu

connotu, adoradu ian a issu.

 

45.

S'esserat custu Deus esistidu

prima de nos mundanos eredeos,

no aiat su mundu ateros deos

prima de isso adoradu e servidu:

e nemanch'issu aiat permittidu

ad' asianos ed europeos,

de venerare dae polu a polu

ateros deos che a issu solu.

 

46.

Sun trintamiza a lu narrer in Sardu

Deos antigamente chi adorana

prima 'e su babbu eternu, e oe hana

credentes prus de unu miliardu,

su babb' eternu naschid'est prus tardu

e cun sa forza sua soberana,

tenet solu tra tottu sos viventes

treighi miliones de credentes...

 

47.

Si de tottu sos deos sa possanza

su babb'Eternu haeret superadu,

sol'issu de credentes fit istadu

de dogn'ateru Deu in maggioranza;

ma send'issu su prus in minoranza

de dogn'ateru Deus veneradu:

est prova certa chi no hat podere

e ne de chelu e terra est issu mere!

 

48.

Resultat d'esser cust'eternu Rè

a dogn'ateru Deu inferiore,

pro chi s'istadu fìt superiore

si fit distintu pro natura in sè;

solu l'hat nadu e iscrittu Mosè

ch'est'issu onnipotente e creadore:

ma pro lu crere non bastat, de seguru,

su lu narrer; bi cheret provas puru!

 

49.

Est tottu imbrogliu o mundu ischire tese

de sos Deos e Deas s'impiantu,

mortu Mosè, s'apostoladu intantu

su babb' eternu divisu hat in trese;

e tue prima in d'unu como crese

in babbu, fizu e ispiridu santu!

cheret narrer chi deos milli e unu

a gustu sou, nde faghet dognunu.

 

50.

Sette seculos pustis sepultadu

Cristos, fìzu de Deu e de Maria,

pro deu onnipotente in s'Arabia,

A Maometto s’ana incoronadu;

su nostru babbu eternu nomenadu

ne i su fìzu sou, su Messia.

No est dae sos arabos connotu

ch'a Maumetto dognunu est devotu.

 

51.

Tempus prima, sa cresia Romana,

d'esister Maumetto fit fundada;

su deus Giov'e Marte issa adorada

fina a cando s'est fatta cristiana;

provat chi sa potenzia soberana

de su babbu eternu, penetrada

in cussu tempus in issa non fiat,

si a Giov'e Marte adoraiat...

 

52.

Giove e Marte su mundu a tottu proa

dominàt prima de su babbu eternu;

si trattat ch'issu est bintradu in guvernu

battor' mizza annos de custos a coa;

da s'era cristiana epoca noa

Roma connotu hat su Deus modernu;

e dadu a tando grorias a vantu

a babbu e fizu e ispiridu santu.

 

53.

Però happende sos contos tiradu

cun babbos, fizos, ispiritos santos,

chi non teniat introitos tantos

Roma, che prima in su tempus passadu;

e it'hat fattu? Hat santificadu

baranta mizza tra santas e santos

e costruidu hat cresias e colonnas

a treghentassessantotto Madonnas...

 

54.

Forsis Roma l'hat fattu pro ingannu

d'haer tantas madonnas tituladas?

No! L'hat fattu pro esser festeggiadas

tottu sas dies chi benin in s'annu.

Santos bi nd'hat unu numeru mannu

ch'in s'annu no han dies signaladas,

custos in biddas, cittades e portos

sun festegiados paris cun sos mortos!...

 

55.

Diffattis chi su die maccarrones

si pappat pro costumene connotu:

chie los pappat cun casu e regotu

chic cun bagna 'e puddas e cabones.

santos e festas e processiones

bind'hat bundantes pro dogni bigotu,

chi tantu a bustu comente a chena

bistare poded'a bentre piena.

 

56.

Sa religione est una miniera

pro pabas, munsegnores e viccarios;

sos santos sunu tottus impresarios

chie in un'arte chie in d'una carriera;

o populu ignorante, cunsidera

ite fruttu ti dan sos santuarios?

Non bides santos, madonnas e Cristos,

ch'est unu isfruttamentu a sos artistos?!

 

57.

Osservas pro dogn'arte o mestieri

ch'hana postu unu santu protettore;

pro sos massajos est santu Sidore,

santu Vissente, 'e su mastru ferreri,

santu Crispinu pro su sabatteri,

santa Barbara pro su minadore,

santu Giuseppe cantende a s'anninna...

est protettore 'e sos mastros de linna.

 

58.

Santu Cosimu e santu Damianu

pro su dottore e pro su farmacista;

de sos chi sun guastos a sa vista

santa Lughia s'impresa hat in manu;

su pastore in ierru e in beranu

protegget santu Giuanne Battista;

a sant'Antoni, festadu in benharzu

l'hat fattu protettore 'e su porcarzu.

 

59.

Santu Pedru impresariu de sas craes,

protegget sos craeris de sa Banca;

santu Micheli giughet in farranca

su pesu, e pesat sas animas graes,

santu Roccu tumores e piaes

curat de sos chi meda bettan s'anca,

Maria Madalena protetrice

est de dogni mundana peccatrice!...

 

60.

Tenimus puru a santu Costantinu

ch'est protettore de sos gherrieris

viaggiadores tottu e passizeris

han sa Madonna de Bonu Caminu;

sant'Andria protegget de continu

sos piscadores cun sos marineris;

Maria de su Nie prus benigna

prottegget sos chi benden carapigna.

 

61.

Infine: pro dogn'arte o maladia

unu santu reparat sa tempesta,

pro curare ogni male e dogni pesta

postu han de su remediu a Maria,

tiat bastare custa sola ebbia

però non bastat una sola festa:

ca senza tantas festas bene ischides

no poden benner riccos sos preides!

 

62.

E tiat esser unu grave dannu

senza festas non benner quattrinos,

su corpus de sos poveros mischinos

isfruttan sos padrones tottu s'annu,

s'anima, sos preides cun ingannu,

isfruttan de sos poveros...crettinos

e nd'hana da sa zente pusillanima:

su fruttu de su corpus e de s'anima!...

 

63.

Pro cunfortare dogni peccadore

puru a crere sos populos han dadu,

chi dogni santu in chelu est avvoccadu

de sos devotos suos difensore.

Chi l'est in vida in morte protettore;

e si benit da' Deus cundennadu

a su fogu eternu pro brujare,

curret lestru su santu a lu salvare!

 

64.

Si trattat chi su regnu celestiale

est uguale a su mundu profanu;

chie tenet su gradu 'e capitanu

chie de cumandante generale,

s'odiernu sistema padronale

in chelu che in terra l'hana a manu

e chie santu non tenet in corte

est in s'inferru in vida e in morte.

 

65.

Si pustis mortu sa vida beata

tue cheres in chelu acquistare,

caru devotu, bisonzat pagare

antecipadu in oro o in prata,

betta s'offerta tua a sa safata

chi est'a pes de su santu in s'Altare,

si cheres esser in chelu Segnore

si no! T'ingullet s'Inferru ah!, It'errore!!

 

66.

Criticat sa ecresia romana

sos Ebreos ca tottu cun decoro,

han adoradu un vitellu d'oro

comente e deidade soberana;

e issa, chi si vantat cristiana,

aradu e boes de Sant'Isidoro

adorat, cun su naschidu Messia

ancoras una mula in cumpagnia!!...

 

67.

Mira cun Santu Giorgi figuradu

in s'Altare unu caddu poderosu

e dae su credente religiosu

benit su caddu e su santu adoradu,

ed est puru su porcu veneradu

cun Sant'Antoni bellu gloriosu:

e giamat idolatra contra Deus

s'Ebreu, sende issa malepeus!

 

68.

Assumancu s'Ebreu solu a unu

animale fatt'hat festeggiamentu,

sa cresia romana piùs de chentu

nd'adorat, e de tantas razzas sunu!

Cust'est a dare a Deus importunu

pro chi cun vera fide e sentimentu

adoran sos fideles tottugantos

Deos impare a Bestias e Santos!!...

 

69.

Unidamente a madonninas bellas

adorat su cattolicu credente

su Coccodrillu, su vile Serpente,

su Sole, e i sa luna e sas istellas.   .

E cun santu Micheli in sas capellas

adorat su Demoniu prepotente,

chi su mattessi santu hat suttapese

oh! bigotismu, a ite puntu sese!...

 

70.

Davide, in d'unu salmu ispiegare (il 115)

solit a tottu cun sentidos sanos,

sos deos giughen bucca, ojos e manos,

giughen pese e no poden caminare,

caminare, toccare, faeddare

no poden ca sun tottu idulos vanos,

e sos ch'in issos confìdana fissos

sun istattuas similes a issos...

 

71.

Sende s'omine in terra superiore

subra dogn'animale, ogni materia,

una scultura adorende a sa seria

benit a sa materia inferiore,

torrat dae padronu servidore

ruet in s'idolatra cattiveria,

ca pregat e s'invocat e s'inchinat

a sa materia chi s'arte cumbinat.

 

72.

Bastat: serremus custu repertoriu

de trapulas e santos de s'altare:

trattemus su pattire, su gosare

de chelu, de inferru e purgatoriu,

limosinas e missas de offertoriu

chi sos furbos han devidu inventare;

su riscattu de s'anima rivale

da' sa purgante pena temporale!

 

73.

Ammitinde chi Deus a trint'annos

cundennerat un anima a sas penas,

sos preides, cun missas e novenas,

la salveran da penas e affannos;

risultat, chi piùs poderes mannos

de Deus hant sas personas terrenas;

già chi de annullare sa sentenzia

fatta da Deus s'omine hat potenzia!

 

74.

Sa bella est chi si faghene pagare

dae sos credulones ignorantes

pro salvare sas animas penantes

chi sunu in purgatoriu a brujare;

e, non paghende, las lassana istare

brujare in sos vulcanos fiamantes...

imbecilles!...si ruet ue passo

un'omine in su fogu, eo lu lasso?!...

 

75.

Dae su fogu pro giustu decoro

deo lu salvo su simile meu;

ma sos giamados ministros de Deu

de lu lassare brujende han su coro!

Ca crene solu in Deus de s'oro

isfruttadores de su mundu intreu:

chi supra a Deus, anima e peccadu

han su santu negoziu fundadu.

 

76.

S'eterna vida felice e amena,

su paradisu pius magnifìccu,

tue l'agatas in domo ‘e su riccu

pro chi de dogni grazia est piena:

gosat dogni delizia terrena

a giovanu, a betzu e a pitticcu.

Si tue chircas anima beatas

prus de domo 'e su riccu, ue nd'agatas?

 

77.

Ei s'inferru ardente a meraviglia

de penas e dolores, su piùs tristu,

est in sa domo 'e su poveru artistu,

massimu d'unu babbu de famiglia,

senza trigu dinari ne mobiglia,

de dogni bene e grazia isprovistu.

Nudu est issu e nudos hat sos fìzos

cust'est s'inferru 'e veros martirizos!

 

78.

Tottu cuddos ch'in terra hana patire

durante vida dolore e piantu,

naran: Deus in chelu ateretantu

benes eternos det rettribuire;

ma custa vida d'eternu godire

l'agatat in sa fossa in campusantu!

Morit accabat sa vida penosa,

godit su paradisu intro sa losa.

 

79.

S'omine riccu ch'in su mundu passat

sa  vida sua felice e cuntentu;

su morrer, certu, l'est pena e turmentu

ca dogni bene in custu mundu lassat;

piùs no si disvagat ne s'ispassat

in ballos, giogos de divertimentu;

inserradu in sa tumba dolorante,

ecco s'inferru de su benistante.

 

80.

Si creteran sos nobiles e dottos

de s'inferru in sas penas e turmentos,

e dae sos vulcanos elementos

d'essere poi mortos bene cottos

avaros non dian esser ma devotos

durante vida; e sos possedimentos

in limusinas tian consumare

pro no andare a s'inferru a brujare!!

 

81.

Invece coros duros e redossos

sun send'in vida; e han s'anima rude

e non pensan a s'ultima salude

che bonos religiosos ortodossos;

aman de isfruttare pulpa e ossos

a su poveru sende in gioventude:

e a bezzu lu mandan, pro condanna,

a mendicare dae gianna in gianna!...

 

82.

Ecco sos fruttos de sa santidade

de sos ch'in Deu e in s'anima crene!

Preigan in su mundu a fagher bene

e issos trattan cun barbaridade!

Amore sende in vida, e caridade.

no nd'hana mai usadu e ne nde tene,

e bidimos da su proceder feu

ch'in s'anima no crene ne in Deu!

 

83.

Chelu e inferru est tott'in custu Mundu,

bene da' sè lu cumprendet dognunu,

e poi mortu no l'ischit nessunu

sos ch'ana fattu istudiu profundu,

si b'hat istadu infelice o giocundu

ca omines terrenos tottu sunu

sos chi Chelu, e Inferru han preigadu:

e nessunu a lu ider est andadu!

 

 

TERZA  PARTE

 

1.

Tottu sos ch'azis bona intelligenzia,

si de Cristos sa vida esaminades,

e cun s'artista la paragonades

in cosa alcuna non b'hat differenzia;

subra dogni mundana sofferenzia

tale che Cristos s'artist' incontrades,

e si cantu naro eo non creides,

leggide s'Evangelu e l'idides!

 

2.

Figuradu hat sa seta ingannatrice

su Messias de sa celeste corte,

in sa vida, in sa naschida, in sa morte

limosinante, poveru, infelice,

a tales chi sa classe produtrice

mai speret de cambiare sorte

e vivat suttoposta a dogni male.

Paziente, e che Cristos uguale.

 

3.

S'in d'una domo da' su fumu gialla

naschet su poverittu, no est bassesa.

E ne mancu birgonza ne vilesa,

ca Cristos est naschidu in una stalla,

cun tale frase, sa preideralla

cunfortat s'affligida poveresa

nende: su nascher no est disonore

in gruttas, o barraccas de pastore.

 

4.

Si no hat matterassu né lenzolu

cando naschet s'infante isfortunadu,

passenzia! ch'ha Cristos l'han corcadu

in d'una pappadorza pro brassolu.

Si vivet in miseria no est solu

senza domo, famidu e ispozadu

ca Cristos puru fit senza palazzos

e istesit fascadu de istrazzos.

 

5.

A Cristos visitadu, sende infante,

l'han sos res d'Oriente in mod'u grattu

su donu prezziosu issos l'han fattu

d'oro, incensu, e mirra profumante:

a vint'annos su poveru bracciante

lu visitan sos res, e in tal'attu

rezzit in donu sos milites pannos

zainu e fusile pro tres annos.

 

6.

Cand'unu artista da' sa' idda sua

fuit atteras terras pro campare,

o persighidu li toccat istare

che bandidu in su buscu cua cua;

Cristos puru in s'Egittu a tottu fua,

andesit da Betlem, pro si salvare.

Su poveru no nd'happat dolu o pena,

s'andat pro si salvare in terra anzena.

 

7.

Sende pitticu a pe no iscappadu

Cristos portadu fit peri sa via,

in brazzos da Giusepp'e da Maria

o puru accaddu a s'Ainu imbastadu

unu pizzinnu poveru trattadu

non benit certu cun prus cortesia

ca medas mamas andan pro su soddu

a fasch’e linna e a pizzinnu accoddu.

 

8.

Su poverittu appena essit da' niu

est, in s'umana vida trupegliosa,

portadu da’ sa mama bisonzosa

a samunare pannos a su riu.

E a coglire s'ispiga in s'istiu

pattinde famen, sidi e dogni cosa;

ca Cristos puru sende criatura

suffridu hat frittu, famene e calura.

 

9.

Cand’una poveritta famigliola

no hat fizu dottore, nè profeta,

devet istare cuntenta e lieta

ca mancu Cristos no hat fatt'iscola

penset chi senz'istudiu no est sola

ca Cristos puru fit analfabeta.

Essend’ analfabeta su Messia

no tenzat de nessunu gelosia.

 

10.

Si solu pro su pane intrat in lotta

su poveru in s'edade piùs pizzinna,

penset chi Cristos su mastru 'e linna

imparadu hat pro haer sa pagnotta,

e preferidu at che persone dotta

su tribagliare piùs de sa pinna,

su poveru che Cristos volonteri,

imparet puru un’ arte o mestieri.

 

11.

Si tue poverittu in malu istadu

vives, senza ricchesas e ne dottes,

invanu est chi ti lagnes o borbottes

c’a mendicare Cristos est andadu,

e hat in su desertu digiunadu

baranta dies e baranta nottes;

e tue si digiunas barant'annos,

vive cuntentu in mesu sos affannos!

 

12.

A Cristos turmentadu hat su Demoniu

in su desertu, sende penitente

turmentadu un'artista ugualmente

benit da’ sos ch'han riccu patrimoniu,

e trasportadu pro miseru coniu,

a gustu insoro a levante a ponente,

che a Cristos da' monte in campanile

portadu l'hat su Demoniu vile.

 

13.

Si benit un'artista ripprovadu

pro calchi lamentosa cunferenzia,

solu pro narrer cun giusta cussenzia

ch’est dae sos guvernos isfruttadu,

fit Cristos puru, cand'hat preigadu,

persighidu cun tanta violenzia

da' sos giudeos, guvernos malignos!

pro impedire sos suos disignos.

 

14.

Cand'un artista pro iniquizia

imputtadu benzerat innocente,

causa d'unu amigu unu parente

ch'esserat rutt'in manos de giustizia;

a Cristos puru Giudas cun malizia

l'hat traittu basendelu umilmente

un artista perdonet su delittu

s'est innocente che Cristos traittu.

 

15.

Cando pro giustu e cumpridu reatu

benzerat unu artista detenutu,

e trasportadu, pro ordine assolutu,

da' unu logu a s'ateru in tal'attu,

penset chi da' Erodes'a Pilattu

Cristos puru ligadu istesit giutu,

si benit un artista cun violenzia

arrestadu, coraggiu! e passienzia!

 

16.

Cando Cristos est devidu alziare

carrigu de sa rughe a su Calvariu

Simone Cireneu, volontariu,

sa rughe li cheriat sollevare,

ma impedidu l'hat de l'azuare

su partidu ch'a issu fit contrariu,

nende: Simone, a tie no est permissu;

lassa sa rughe, chi la ported'issu!!

 

17.

Gasi mattessi est cando unu riccone

pensat de sollevare calchi poveru,

dendeli una domo pro ricoveru

ch'hat de sa povertade cumpassione,

sos ateros de mala intenzione

l'impedini, e li naran cun rimproveru;

si tue azuas sa zente mischina

pones in domo tua sa ruina!

 

18.

Cristos in rughe l'hat sa zente mala

mort'in sa bella edade giovanile,

su poveru, sa classe segnorile,

hat pro rughe pesante sempre a pala;

pro la sustennere, in pomp'e in gala,

morit sutta de cussa rughe vile

nudu, senza camisa nè calzones

comente Cristos in mesu 'e ladrones.

 

19.

Amittinde unu Cristos redentore,

de comente su clero hat preigadu,

amittinde, chi s'omine tentadu,

da su serpente rutt' est in errore

amittinde unu Deus criadore,

chi cant' esistit in terra hat formadu,

e ch'hat potenzia in pagos segundos

de fagher e disfagher milli mundos.

 

20.

Si Deus hat su podere sovranu,

e subra dogni cosa est imperante,

podiat su Demoniu dominante

benner de tottu su genere umanu?

comente narat su clero romanu

pro ponnere in paura s'ignorante?

chi s'omine pro culpa 'e su peccadu

fit dae su demoniu ligadu.

 

21.

Si dogni cosa hat fattu Messer Domine

in su nostru terrestre patrimoniu,

creo chi fattu puru hat su Demoniu

e chi fatt'hat sa femmina e i s'omine:

no est giustu autore eo chi nomine

de su peccadu, a tiziu a simproniu,

sende Deus mattessi s'autore

de serpente, peccadu e peccadore.

 

22.

Nade, si mai unu Deus perfettu

podiat imputare de reattu

s’omine a somiglianza sua fattu

a tortu l'hapat fattu o a derettu

s'issu l'hat fattu a peccare suggettu,

e chi s'omine est ruttu in disbarattu

non podiat no, s'omine mancare,

coment'issu l'hat fattu d'operare.

 

23.

E si cust'Ente supremu celeste

est in su chelu, in terra, in dogni logu,

est puru in s'abba, in s'aria, in su fogu,

e tando su Demoniu inue este?

mund' impostore, giustu est chi proteste

e narrer, senza brulla e senza giogu,

s'in dogni logu est Deus in persone

non tenet logu sa tentazione.

 

24.

Senza custu podimos bene credere

chi Deus fit de tottu a conoschenzia,

cun sa sua Divina onniscienzia

ischiat cantu li diat succedere;

prim' a s'omine vida 'e li cuncedere

e si est rutt'este in disubidienzia

s'omine, o siat de peccadu reu

est volontade e causa de Deu.

 

25.

Pro isposare una femina sola

pover' Adamu, ite disfortunadu!

dae Deus istesit cundennadu

issu, e tottu sa discendente prola.

E Salomone chi hat dadu iscola

a settighentas feminas culpadu

no l'hat Deus ne postu in disciplinas

puru happende treghentas concubinas.

 

26.

Adamu, sende un omine massagiu,

analfabetticu e pagh'istruidu,

meritat dae tottu cumpattidu

si nd'hat segadu una Rosa de Magiu,

ma Salomone, un omine sagiu

astutu sapiente in tottu ischidu,

meritat prus d'Adamu cundennadu

milli bortas, ca milli nd'hat segadu.

 

27.

Pro una sola, cun tottu s'erenzia,

fit cundennadu Adamu a sa tortura,

pro milli Salomone, ite loccura!

peccadu, ne cundanna, ne sentenzia

non b'hat istadu, ite bella cussenzia!!

Como conosco ch'est tottu impostura,

e chi l'hana sos furbos inventadu

pro usu de cummerciu - su peccadu.

 

28.

Si fit beru ch'est Deu onnipotente,

presente in dogni logu bellu o bruttu.

fit cando s'omine in peccadu est ruttu

puru inie in cuss'ora presente:

de ponner in malizia s'innocente

hat permittid'a su serpente astuttu,

duncas, happende mancadu o fallidu

s'omine, est Deus chi l'hat permittidu.

 

29.

Si Deus tottu hat bidu, e hat permissu

a s'omine terrenu de peccare,

it' importat su mundu pro salvare,

fagher morrer a Cristos Crocifissu?

si Deu onnipotente solu est issu

senza Cristos podiat remediare

dogni fallu mundanu dogni errore

sende supremu padronu e segnore.

 

30.

Cristos in terra ch' esistidu siat

coment'omine tottu lu creimos,

ma da su sou operadu bidimos

chi podere Divinu non teniat:

amitto chi miraculos faghiat,

comente ateros oe nd'intendimos,

chi senza alcunu podere Divinu

faghene trasformare s'abba in binu:

 

31.

S' aberu Cristos Divina natura

haeret tentu, e podere infinitu,

cand'hat passadu Erodes malaitu

a fil' ispada dogni criatura

in Betleme, fuidu cun premura

pro si salvare non fit in s' Egittu;

ma prima Erodes d'essere arrivadu

a Betleme, l'haiat fulminadu.

 

32.

Chi tenzat Cristos divinu podere

no l'amitto, ch'est una falsidade,

ca teninde divina podestade

e de chelu e terra sende mere,

fìt istad'issu in gradu e in dovere

de dare a tottu paghe e libertade,

mentres chi libertade ne cuncordia

non ch'hat in custu mundu de discordia.

 

33.

Est tottu vanu chi trintatres annos

Cristos in terra che siat istadu,

ca comente issu hat happidu hat lassadu

su mundu cun discordias e affannos,

distruidu no hat sos res tirannos

anzis han creschidu e moltipricadu,

e de continu a gherrare han sighidu

prima e posca chi Cristos est naschidu.

 

34.

Si sa paghe tra tottu sos viventes

su messia in su mundu eret portadu,

comente narat su clero, e hat nadu,

in sos tempos passados e presentes,

dunis haer pro provas evidentes

chi prus nessunu no iat gherradu,

ma deviat regnare sempre eterna

sa paghe, e sa cuncordia fraterna.

 

35.

Si pro cappricciu dogni latitudine

de su globo terrestre oe girades,

paghe ne libertade no incontrades

ma solu gherras e isclavitudine,

cun odiu, avarizia, ingrattitudine,

comente, tando, su Messia nades;

ch'hat postu paghe, in su globo terreste

s'in gherra e in discordia ancor'este?

 

36.

De pustis chi Mosè nd'hat liberadu

sos isclavos Ebreos da' s'Egittu,

e de Sinai a su desertu littu

su populu novellu est arrivadu,

aspramente Mosè l'hat obbligadu

a crere in d'unu Deus infinittu

cun sos comandamentos d'osservare

de non bocchire nessunu, e non furare.

 

37.

Subra cantu Mosè hat fatt'appellu

riverente ogn' Ebreu hat iscultadu,

ma cando s'est Mosè allontanadu

de sa legge a descrier su modellu,

su populu de oro unu vitellu

s'hat fatt' e l'hat che Deus veneradu

ch'abituados gai, no novizios,

fin d'adorare sos Deos Egizios.

 

38.

Cando Mosè haiat congluidu

de iscrier sa legge, o maraviza!

falende da' su monte alzat sa chiza

e i su populu adorende hat bidu

unu vitellu d'oro costruidu:

dende lodes a custu prus de miza;

Mosè, a s'attu indecente infedele

rimproveràt narende a Israele:

 

39.

"Proite, o Israele, has trasgredidu

sa legge d'unu Deu onnipotente?

pensa cand'in s'Egittu fis dolente

da Faraone isclavu e opprimidu,

chi t'hat issu salvadu e custodidu

e tue ateros Deos riverente

ses in compensu cha t'hat liberadu,

però oe pianghes su peccadu.

 

40.

E in s'attu Mosè hat ordinadu

a sos ebreos de si separare,

partegianos de issu, e impugnare

sas armas prontamente lis hat nadu:

centra cuddos chi hana idolatradu

devet su frade su frade isvenare.

Ubbidit dogni bonu israelittu

e nd'hat mortu tremizza in su conflittu

 

41.

S' istrage sambenosa, su misfattu

chi Mosè hat devidu consumare,

a tie lasso, lettore, pensare

si b'haiat mutivu de reattu?

si a s' Ebreu in s'Egittu l'han fattu

su vitellu de s'oro venerare

pro veru Deu, da sende bambinu

ite culpa teniat su mischinu?...

 

42.

Sa zente da' pittica incamminada

in qualunque siat religione,

no cambiat a manna opinione

pro chi li dias un archibussada.

Gasi sa zent' Ebrea amaestrada

dae pittica, cun devozione,

fìdele adorad'hat su Deu sou

e no lassat su bezzu, pro su nou.

 

43.

Como sa culpa'de tale inclemenzia

a chie de la dare mundu elegges?

forzis a sos Ebreos, chi eregges

tue los giamas? no! tene passienzia;

culp'est de Deu ch'hat dadu esistenzia

prim'e sas suas ad'ateras legges;

mentres s'issu sa legge prima 'e tottu

l'haeret dadu, custa iat connotu.

 

44.

Pro sa fide de unu babbu eternu

de s'ispada servidu si est Mosè,

tantu pro haer che profeta e rè

de su populu Ebreu su guvernu;

ateretantu su clero modernu,

pro sa fide de Cristos mundu crè,

cun rogos e torturas, de persones

fatt'hat morrere a contu 'e milliones.

 

45.

Bido chi de occhire est proibidu

a su populu bassu e ignorante,

e ch'a su Demagogu a su regnante

est, solu riservadu e permittidu.

Ecco sa legge 'e Deus trasgredidu

ch'hat Mosè cun su Clero segudante;

però pro issos tottu est dispensadu

e no esistit legge ne peccadu.

 

46.

Sa religione prima in Palestina,

poi in Spagna, in Italia, in Franza,

istesit, cun s'ispada e cun sa lanza

fatta crere, non pro opera Divina,

da cudda zente furba e malandrina

chi bramat d'haere una maggioranza,

de populos e terras tottu impare

pro poder in su mundu dominare.

 

47.

Pro conchistare sa terra promissa

chent'ortas Giosué dad'hat s'assartu

tantu sambene umanu b'hat ispartu

a doppiu de cantu balet issa.

Carlo Magnu fatt'hat istrage e rissa

pro riscattare 'e Cristos s'istendartu,

pro cunverter sos populos paganos

s'àt intintu de sambene sas manos.

 

48.

Mira puru gherrende unu Sansone

contra sos miscredentes Filisteos,

pro sa fide 'e su Deus de sos deos,

mille gherreris post'hat a muntone:

Orlandu furiosu che leone,

sos saracenos hat postu in anneos

unu gallicu s'ateru giudeu;

unu gherra pro Cristu, unu pro Deu.

 

49.

Shangar, Baraccu, andesini a gherrare

Davide, cun Saulle, e Gedeone,

totu pro interessu 'e religione

e populos e terras conchistare.

Fioravante, e Rezzieri impare,

Tancredi cun Rinaldu in unione

pro propriu interessu fatt'han gherras

pro sa fide de Cristos e pro terras.

 

50.

Pro mesu e sos eroes paladinos

sos pabas conchistadu han sos poderes,

guvernadu su mundu hana che meres

chimbighent'annos e piùs continos

isparghinde su sambene a trainos,

bocchende babbos, fizos e muzeres,

cuddos ch'a modu insoro non crediana,

a lu narrer in Sardu, los bocchiana.

 

51.

Si sa Gerusaleme de Torquatu,

e de sos paladinos sas istorias

leggides, cantas gherras e penorias

pro sa fide de Cristos, hana fattu;

poi. dae Mosè, su longu trattu

de tantos res sas gherras antigorias,

chi solu in Cananèa Giosuè

gherrende mortu b'hat trint'unu rè.

 

52.

Sas religiones tottu sociedades

sun comente sos ateros partidos

d'una idea fundad'in terra unidos

pro conchistare tronu e podestades

in dogn'epoca e tempus s'osservades

bind'hat calmos, bind'hat inferocidos

tott'amantes de bonos aquistos

chie gherrat pro Deu, chie pro Cristos.

 

53.

Su veru Cristos est su lavorante

ch'in dogni tempus su mundu hat redentu,

dendeli pane, alloggiu e vestimentu

de sa terra a dogn' essere abitante,

cuddu ch'est mortu in rughe agonizante,

naru cun bona fide e sentimentu

chi sende mortu in sa rughe incravadu

no podet haer su mundu salvadu.

 

54.

Sende mort'in sa rughe crocifissu

cuddu Cristos giamadu redentore,

non podet de su mundu salvadore

esser, ca mancu sslvadu s'est issu.

Salvat su mundu, tribagliende fissu

s'artista, su massaiu, su pastore,

pro chi produene in dogn'annu agrariu

cantu a s'umanidade est necessariu.

 

55.

Hazis a narrer: si: ma da s'altura

Cristos mandat sas abbas de arare,

sole, e nie chi faghet prosperare,

sos alimentos de s'agricoltura;

no ischides, sa propia natura,

de sa terra, hat virtude d'attirare,

a sé sas nues che potente mole

abba, randine, nie, bentu e sole.

 

56.

Dae cando in sa terra so naschidu,

in forma de un essere vivente,

a Cristos de sa nues dirigente

su cursu 'e chimbanta annos no hapo idu,

s'omine astuttu, malignu, fingidu

fatt'hat crere chi Cristos mundu e zente

guvernat, proet e dat vida e mottu:

mentres chi da' sa terra benit tottu.

 

57.

Cando sas nues si tumbana appare

in sas aeras, in tempos non bonos,

produin lampos, orribiles sonos

chi nois tronos solimos giamare,

su furbu a s'ignorante pro ingannare,

narat chi Deus los faghet sos tronos,

cando contra de nois s'arrennegat

fulminat, bocchit e truncat e segat.

 

58.

Ma tott'est vanu, Deus chi s'airat

contra su peccadore mundu ingrattu,

ca pro reparu s'omine s'hat fattu

sa calamita chi su lampu attirat.

Cando issu de fulminare mirat,

s'omine cun s'elettricu apparattu.

riparat de su lampu sa violenzia

e disarmat a Deus de potenzia.

 

59.

A Cristos l'han pro bona convenienzia

deificadu sos furbos mitrados,

pro dare esempru a sos diseredados

chi Cristos non teniat possidenzia.

Sì, da sa padronale prepotenzia

custos sunu in su mundu calpestados

mustrare non si devene insolentes

ma, che Cristos umiles, pazientes.

 

60.

D' haer Cristos salvadu mundu e zente

non cretedas ca fit a paragone,

comente una nobile persone

d'unu grande marchesi possidente,

chi cret cun sa ricchesa solamente,

de salvare una intera nazione:

però si non tribagliat e produet

sa ricchesa a niente no influet.

 

61.

Gasi matessi Cristos Nazarenu

fit che marchesi improduttiva landa;

su tempus ch'issu hat fattu propaganda,

campadu s'est da su tribagliu anzenu,

lu narat s'Evangeliu in pienu

chi Cristos est andadu a sa dimanda,

duncas resultat su mundu, e a Cristos

chi semprere han campadu sos artistos.

 

62.

Sos artigianos, biddas e cittades

hana custruttu, e istradas e pontes,

non sunu Cristos, marchesis nè contes

ch'han tribagliadu in tottu sas edades,

lughes de gas e d'elettricidades,

acquedottos, potabiles fontes

han, pro sos artigianos, mottu e vida

dogni bidda e cittade costruida.

 

63.

Cuncertos musicales mandolinos,

cinemas, e teatros e cantores,

ristorantes, cunfettos e licores,

passizadas e pubblicos giardinos,

sigarros, sigaretas e luminos,

festas, fieras, caddos curridores,

tantu sia de mente che de manos

opera totu est de sos artigianos.

 

64.

Carrozzas, automobiles, tramvias,

bastimentos, piroscafos navales,

telegrafos, cun postas e giornales,

macchinismos, veloces ferrovias,

incisiones, e fottografìas,

casteddos, monumentos eternales,

cantu in su mundu d'arte esistit tottu

fatt'hat su veru Cristos non connotu.

 

65.

Su falsu Cristos, cun su benistante,

mai no hana su mundu salvadu,

ca semprerunu ed'ateru campadu

est dae palas de su lavorante,

a bezzu, a giovaneddu e sende infante,

l'hat s'artista bestidu et allattadu,

e cand'est mortu, l'hat giutt'in carrossa

oppuru accoddu finas a sa fossa.

 

66.

S'omine furbu s'ignorante trampat

nende: chi senza riccu e senza Cristu,

in su mundu no campat un artistu

mentre senza s'artistu issu no campat:

tottu sa valsa fide ch'issu lampat.

Cando bene l'esaminat s'abistu,

bidet craru, chi, senza s'operariu

no campat s'oziosu proprietariu.

 

67.

Si logicu su fattu e giustu fiat,

in s'epoca antigoria passada;

morta sa classe artista fit istada

ca Cristos tando e riccos non ch'haiat.

Mentres ch'a chentu ortas istaiat

meda menzus, senz'esser'isfruttada

dae cando esistidu est riccu e Deus

vivet, de tando chentu ortas peus.

 

68.

Suffrit su lavorant’agricoltore

de s'jerru sa rigida frittura,

e in s'istiu, a sa mietittura,

su soffocante arsibile calore,

e i su nobile illustre segnore

in campagnatas e villeggiatura

a s'incunza regollet dogni fruttu

lassende s'artigianu a runcu assuttu.

 

69.

S'Abe, cantu fattigat e peleat

pro fagher de su mele conquista,

a su tempus chi fatt’hat sa provvista

andat su mere e su mele nde leat;

a tribagliare tottu s'annu impreat

e nde tenet sa parte piùs trista

no podet de su sou issa disporrer

che su tantu de viver pro no morrer.

 

70.

S'artista puru, in s'umana laguna,

tribagliat pro mantenner su mandrone,

de su fruttu de sa produzione

no ndeli dan de chentu partes una

in mesu sa ricchesa no hat fortuna

pro chi bi ndela leat su riccone,

si nde tenet su pane a si nutrire

li mancat su calzare e su bestire.

 

71.

Ma si de s'Abe s'esempru sigheret

su mundu menzus caminare tiat,

su mandrone chi non tribagliaiat

ugualmente a s'Abe lu occheret,

creo s'isfruttamentu chi cesseret

ca dognunu sa morte la timiat,

e si cheriat pane a mandigare

li beniat forzosu a tribagliare.

 

72.

S'Abe, sa fratellanza, sa giustizia:

mustrat prus vera e sa vera unione

dat esempru a s'umana nazione

chi nemos devet fagher sa preizia,

devet produer dognunu a dovizia

pro mantenner sa propia persone,

e fina a cando non faghimos gai

paghe tra nois non ch'adesser mai!...

 

73.

S'omine riccu, in d'una paraula,

non produet, nè faghet benefìziu,

ca lu tenet de naschida su viziu

de fagher su mandrone, e no est faula:

issu est avezzu a mandigare in taula

e fagher de vivandas isperdiziu;

da' sos artista, cun delicadesa,

cheret esser servidu fina a mesa.

 

74.

Su tribagliu de s'altu Signoriu

est de leare in manu sa furchetta,

de si mantenner a pische e a petta

tottu sa vida, cantu durat biu,

passizare in jerru e in istiu

cun sa sua madama a sa brazzetta,

andare in carrozza, a caddu, a pè

dae su biliardu a su caffè.

 

75.

Viagget su riccone in ferrovia

oppuru in nave, in s'oceanu infidu,

da' sos Artistas semprer est servidu

e guidadu fina a s'osteria,

cand'isbarcat, cun grande cortesia,

dae sos artigianos est rezzidu;

li preparan alloggiu, mesa e lettu,

cun tanta riverenzia e rispettu.

 

76.

S'incasu donat mancias o istrinas,

o limosinat calchi mendicante,

pro si mustrare omine galante

regalat pagos soddos o sisinas;

est dinari furadu in sas fainas

da' su tribagliu de su lavorante,

faghet a bier ch'est benefattore,

ma non dat nudda de sou sudore.

 

77.

Comente faghet su riccu birbante

pro fagher una fura piùs esplendida?

ponet de comestibile una bendida

e bendet a libretto, e a contante;

s'est esercente, da' su lavorante,

tenet tottu s'intrada e i sa rendida,

faghet a cumprimentu ogni faina

e pagat tottu in ispesa 'e cantina.

 

78.

In sa buttega sua endet de tottu,

pane, pasta, farina mesturada,

ozu comunu, lardu e aringada,

casu de craba, cunserva e regottu

legumene isceltadu 'e malu cottu

chi coghet prima de issu sa pinzada,

oltre chi mala merce bendet issu

l'imbrogliat in su pesu cu Cummissu.

 

79.

Gai pagat sa nobile persona

cudda limosinante zoronada,

merce de rifiutu istantissada

bendet a caru preziu che bona.

Certa zente usuraria, ladrona

cheriat da sa naschida impiccada,

ca su tribagliu 'e su zoronaderi

pagat in mala merce e in papperi.

 

80.

Oltre su lavorante 'e l'isfruttare

lu ponet in severa disciplina,

dendeli pane siat, o farina

a mesura 'e no morrer' ne campare:

si benit unu a s'ammalaidare

tando li serrat su bonu 'e cantina,

e si no morit de febbre o de frittu

morit disisperadu 'e s'appetittu!!

 

81.

Su riccu nàt chi pagat sas impostas

de cantu tenet in possessione;

chi pagat issu già tenet rejone,

ma bessit tottu dae palas nostas;

si milli scudos si ogat da' costas

nde guadanzat unu millione,

chi pagat sa rejone bi la damos, .

ma semus nois chi tottu pagamos.

 

82.

Sos titulos chi dat a su bracciante,

cudda nobile classe signorile,

est sempre istadu de rusticu e vile,

de mandrone, de tontu, e d'ignorante;

de imbroglione, de ladru, e birbante,

de vagabundu, cretinu, imbecile,

imbreagolu, ispreccone, insolente,

e infine lu trattat de molente.

 

83.

Disprezziare intendimos ispissu

sa nobile Segnora, e su Segnore,

su poveru massaju, su pastore

ca bestidu e civile no est che issu,

ca no pensat s'illustre mincidissu,

chi custos chi hat issu in disonore,

e cittat, cun disprezzu, a paragone,

chi li dana su pane, e i s'anzone!...

 

84.

Cessa, riccone, d'esser insolente,

e sias cun su poveru amorosu,

tantu si faghes de presuntuosu

menzus non ses de sa povera zente;

vantadi solu, chi ses possidente,

pro ch'ateru no has de preziosu;

ma no nerzas chi ses de menzus ramu

ca semus tottu fizos de Adamu.

 

85.

Termine a sas bideas ostinadas

ti cumbenit, o nobile, chi ponzas,

ch'a piùs de su dannu sun birgonzas

a persones che a tie educadas:

pensa chi tue mandigas debadas

in cumpagnia de padres e monzas,

e chi su lavorante notte e die

est tribagliende pro campare a tie.

 

86.

Si tue haias bonu sentimentu

non dias s'artigianu disprezzare,

anzis sos pes li devias basare

dogni die, dogn'ora, ogni momentu,

ca pane a tie, alloggiu e bestimentu

tottu sa vida t'hat solidu dare;

si nd'has da issu sas visceras sazzias,

no torres pro cumpensu malas grazias.

 

87.

Pensa chi tue ses piaga e peste

pro chi vives fattende sa preizia;

tue ses su Cainu ch'ingiustizia

usadu has contra Abele in su terrestre;

non ti mustres superbu ne areste,

istringhe cun su poveru amicizia,

ca ses da' issu bestidu e campadu

tottu vìda, che porcu peisegadu.

 

88.

Torra, riccone, a s'antiga amistade

comente minoreddos cando fìmis,

chi poveros e riccos giogaimis

in sas carrelas in sozziedade,

si fis de nois tando amigu e frade,

sende mannos ancora esser devimis,

unidos in comune fratellanzia,

comente amos connotu dae s'infanzia.

 

89.

Convintu ses o no, capitalistu?

ti paret giustu cantu t'hapo nadu?

a narrer si, t'agattas obbrigadu

ca bestidu e campadu t'hat s'artistu.

Sempre s'artistu non tue ne Cristu,

in dogni tempus su mundu hat salvadu,

e difesu t'hat vida, domo e terras

morind'issu in sos campos de sas gherras.

 

90.

E tue, zente, patria isolana,

senza istruzione e senza iscola,

no t'istes prus che ainu de mola

chi rezzit colpos cantu ndeli dana,

ma legge sa Cummedia Mundana

tue e sa tua discendente prola;

legge, ca cun su tempus incontrare

podes sa vera via 'e caminare.

 

91.

Sa vera Religione d'imitare

est, o bracciante, o possidente, o re,

su male chi non cherzo eo pro me

non devo mancu a tie causare,

cantu bene pro me hap'a bramare

devo bramare e cherrere pro te,

fraternamente in paghe totugantos

senza reccurrer a Deos ne Santos.

 

 

 

 

 

 

CALENDRES WALLONNES

François Brouers




Copyright 1996-1999 by Namo Interactive Inc.
All Rights Reserved.


Namo WebEditor 3.0

 

 

Free Java applets provided by
JavaScript Kit